Góður!!!

Eftir söngvakeppnina núna í kvöld var ég rosa glöð yfir því að rokkarinn okkar hann Eiríkur skyldi hafa unnið. Fannst mér lagið sem hann flutti langbest af þessum níu lögum. Satt að segja hélt ég samt að Friðrik Ómar myndi taka þetta en það eru greinilega mjög margir á sömu skoðun og ég. Fannst mér eins og Friðrik Ómar hafi verið svolítið vonsvikinn þegar hann labbaði upp á svið eftir að tilkynnt hafði verið annað sætið, en svona er þetta bara besti maðurinn vann. Jibbý jei. Áfram Ísland verður öskrað í Helsingi í mai og eflaust fáum við kannski fullt hús stiga frá Norðmönnum þetta árið fyrir tilstilli Eika Hauks. Go Go Eiríkur rauði

Hvað er að?

Hvernig dettur fólki í hug að ganga um bæinn og skemma fleiri fleiri bíla eflaust bara til að skemmta sér? Hvað á að gera við svona fólk ef það næst einhverntímann. Í gegn um tíðina hefur svolítið borið á því að bílar séu eyðilagðir og man ég frá því að þegar ég var krakki þá var mikið um það að bílar voru illa rispaðir eftir lykla og þessháttar. En ég held að þetta sé bókstaflega eitthvað adrenilínkikk fyrir þessa einstaklinga sem eru haldnir skemmdafíkn.

 http://barnaland.is/album/img/4059/20060805130458_2.jpg

Þrír í haldi grunaðir um skemmdarverk í Hafnarfirði í nótt

Nammi namm!!

Ætli þettasé gott fyrir húðina eða er fólk að gera þetta út af því að það elskar súkkulaði? Eitt er víst að mér þykir súkkulaði mjög gott og vil helst hafa það innvortis ekki útvortis.

Súkkulaðibað í tilefni Valentínusardags

Áfallahjálp

Þegar ég horfði á fréttirnar í gærkvöldi varð ég frekar reið og hneiksluð. Þar var kona að tala um stúlkur sem lentu í því að missa sitt meðferðarúrræði þegar Guðmundur var nappaður í Byrginu og eru núna bara á götunni án meðferðar eða annarskonar hjálpar.Hvað er í gangi? Er ekki hægt að finna stax eitthvað úrræði fyrir þessar stúlkur? Hvernig stendur á því að allt þurfi að fara fyrir nefnd sem sendir það svo til nefndar og svo koll af kolli. Hvernig væri bara að rífa sig upp á rassgatinu og gera eitthvað í málinu heldur en að teygja lopan út í eitt.

Einnig eiga mennirnir sem upplifðu hörmungar á Breiðuvík hérna um árið að fá alla þá aðstoð sem til er og ef hún er ekki til þá bara búa hana til. Nóg er að hæfileikaríku fólki og vel menntuðu sem getur hjálpað þessum einstaklingum.

Inn á Mbl.is sá ég að það væri búið að stofna teymi til hjálpar þessu fólki sem hefur lent í svona hræðilegum atburðum(þó fyrr hafði verið),en við skulum ekki gleyma því að það eru liðnir tveir mánuðir frá því að komst upp um Byrgið og fyrst núna eru skjólstæðingarnir að fá hjálp

Vonandi á þjóðfélagið okkar eftir að breytast í framtíðinni þó að ég efi það en maður verður að halda í vonina og gera sitt besta til að bæta það.

Kveðja Jóhanna 

Kompás

Ótrulegt fannst mér þegar ég horfði á Kompás í gær, hversu vitlaus maður hefur verið. Ekki pældi ég í því í öll þau þúsund skipti sem ég hef keypt kjúklingabringur að þær væru uppfullar af vatni, sykri og salti. En eitt er víst að ég mun skoða vel utan á allar pakkningar framvegis.

Annars er ég í sykursjokki eftri BRJÁLAÐ barnaafmæli í gær, borðið svignaði undan kræsingum þó að ég segi sjálf frá. Börnin voru á útopnu allan daginn og var eins og þau væru slegin í rot í gærkvöldi.

Núna er enn ein vinnuvikan byrjuð og skólinn tekinn við eftir átið um helgina, verð ég bara á fullu í verkefnum og prófum þessa vikunna og áður en ég veit af verður komin helgi aftur eins og vanalega. Ég er farin að telja niður fyrir Amsterdam og eru bara 17 dagar í það sukk. Eflaust verð ég skrautleg þá helgina. Kannski sendir maður bara kallinn heim og fær sér vinnu í Rauða hverfinu:)

Nei nei ætli maður verði ekki að fara með honum heim aftur, ég meina hver á að elda ofan í greyið, þvo af honum og halda honum félagsskap, eins og við konurnar vitum þá eru karlmenn yfirleitt ekki færir um að gera þetta sjálfir, þá komum við konurnar til sögunnar. 

Þetta er gott í dag best að ég fari að vinna í þessari bloggsíðu minni og gera hana meira aðlaðandi.

Kveðja bloggstrumpur

 

 

Helgi aftur helgi!!!

Jæja það er komin föstudagur enn einu sinni,sem er svo sem ágætt. Vikan flýgur áfram á methraða alltaf viku eftir viku og fyrr en varir verður bara komin jól aftur.

En í dag þurfti ég að fara í apótek og meðan ég beið rak ég augun í slúðurblöðin í hillunni og eitt blaðanna dró athygli mína eins og skot. Var það Mannlíf með Guðmundi í Byrginu og konunni hans framan á forsíðu svona kampakát og brosandi alveg eins og lífið leiki við þau. En hvað er að? Þarf maðurinn ekki bara að draga sig í hlé, hætta að koma fram í fjölmiðlum? Ekki gat ég lesið alla greinina en ég skaut augunum aðeins yfir hana og sýndist mér hann vera eitthvað eð afsaka sig og heldur hann statt og stöðugt fram að ekkert athugarvert hafi verið við hans hátterni. Og ótrúlegt er að konan hans  situr þarna við hliðiná honum sæt og brosandi og segist bara treysta honum og trúa. Common wake up woman.

Jæja ætli maður verði ekki að fara að sinna börnunum áður en maður fer í matarborð og kannski fái sér eitt rautt. Bless í bili ...Góða helgi 

Brjálað að gera!!

Loksins hef ég tíma til að skrifa í dag. Dagurinn hefur bókstaflega flogið í burtu, reyndar eru allir dagar þannig hjá mér en það er gott að setjast niður og pústa aðeins fyrir framan tölvuna. 

Eftir skólann í dag var stefnan sett á Bónus eins og oft áður, ekki það skemmtilegasta sem ég geri en ef að ég myndi ekki versla þá mundu allir hérna á heimilinu svelta, það dettur engum öðrum í hug að kaupa mjólk og brauð ef það er búið, mamma reddar því.

Svo er maður í góðri æfingu í keyrslu þegar maður er með börn í íþróttum, ein stelpan mín er í handbolta í Fylki og auðvitað þarf hún að fara alla leið niður í Smáíbúðarhverfi á æfingu á fimmtudögum, ótrúlegt að það skuli ekki vera hægt að hafa æfingarnar í hverfinu.

Þegar maður á endalaust af börnum var bara komið að því að sinna næsta barni eftir rúntinn í Smáíbúðarhverfið, við fórum með bekknum hennar í vettvangsferð í Ölgerð Egils Skallagrímssonar, sem var reyndar rosa gaman. Þeir hjá Ölgerðinni voru mjög gestrisnir og buðu krökkunum upp á gos,djús, snakk og samlokur eins og í sig gætu látið, einnig skoðuðum við framleiðsluferlið hjá þeim.

Við fullorðna fólkið vorum hrifnust að fá að vita um bjórframleiðsluna en ekki var við hæfi að ræða þau mál mikið innan um 16 níu ára gömul börn. Vorum við bara að spá í að fá sér vettvangsferð fyrir okkur á föstudagseftirmiðdegi.

Er ég svo á leiðinni núna á kóræfingu, svo reynir maður kannski að kíkja í bók svona rétt fyrir svefninn.

Svona er hinn klassíski fimmtudagur í lífi mínu. 

Ég bloggari!

Jæja núna er búið að neiða mann í að búa til bloggsíðu, aldrei hafði mér dottið það í hug að ég myndi einhverntíman blogga, en svona eru kröfurnar í nútíma námi í dag.

Kannski er þetta bara gott mál, allir geta lesið um mig og mína um allan heim og ef til vill verður maður bara frægur

Fyrsta bloggfærsla

Þessi færsla er búin til af kerfinu þegar notandi er stofnaður. Henni má eyða eða breyta að vild.